هل لبس البنت سبب في التحرش؟!

هل لبس البنت سبب في التحرش؟!

دخولنا في جدال طويل عريض مع تيار بيقول ان من اسباب التحرش لبس البنت, ده اكتر شئ عبثي بيحصل الفترة دي.. حتى لو بكون جزء من العبثية فانا مجرد بفضفض عن نفسي ليس أكثر.. 

اصل نفس التيار ده من عشر سنين بس, كان رافع راية "لن ينتهي الغلاء حتى تتحجب النساء"

تخيل كم الهرتلة والهبد واحد من كام سنة كان شايف مشكلتنا الاقتصادية كلها بتتلخص في الحجاب, مش هيشوف دلوقتي ان التحرش سببه اللبس, نتيجة منطقية يعني لتطور الحاجة الساقعة!

طيب فين المشكلة وليه التحرش زاد والمتحرشين؟!

اولهم الخطاب الديني: اللي اعتمد كليًا من نص السبعينات في المقام الاول التحكم في المظاهر الخارجية للمجتمع المصري  وجزء اساسي من التحكم ده كان فرض الحجاب اجتماعيًا, وطبعًا عشان يأسس للفكر ده اعتمد اعتماد كلي على سياسة "اختاه لو مالبستيهوش اعرفي ان الشيطان منعك" فنلاقي الشيخ الشعراوي واللي كان مفروض رمز الوسطية في مصر حينذاك, يتكلم عن الختان فيبيحه بحجة ان المرأة طول الوقت بتشتهي اي رجُل طول ماهي مش مختونة

https://www.youtube.com/watch?v=rkp2NNF0448

وهنلاقي نفس الشيخ الوسطي بيتكلم على لبس المرأة فيقول ان المرأة بتتبرج إلحاح منها في عرض نفسها على الراجل.

https://www.youtube.com/watch?v=f9TOVyTDev8

وطبعًا الفيديوهات كتير ومليانة كوارث في تأسيس فكر همجي حيواني، بس خلينا نكتفي بدول ونتفق ان ده كان جزء اساسي من تكوين الفكر الجمعي اللي كلنا بنحصده دلوقتي.

ثانيًا التربية: طبعًا اتصدرلنا حديث" تناكحو تناسلو اني مباهي بكم الامم يوم القيامة "

حط جنبه بنص جنيه المثل المصري بتاع "العيل بيجي برزقه" ضيف عليهم بربع جنيه " ثقافة بتقدس العزوه"

فتلاقي ناس كتير بتخلف وهي ماعندهاش استعداد نفسي للتربية, فبتخرج اطفال مش عارفة تحبهم, فيطلعوا مشوهين مكسورين داخليًا وعندهم نواقص نفسية وذاتية واجتماعية.. وهنا بيحصل تشوه في الايجو وعشان مايخرجوش منهزمين نفسيًا يعلنوا عن نفسهم باشكال عدوانية

زي التحرش للتعبير عن فحولته وطاقته الجنسية, او يأذي حيوان عشان يأكد لنفسه قوته..نقدر نقول انه نوع من انواع التنفيس الحيواني للاعلاء من قيمة الذات الوهمية. 

فدلوقتي انت عندك تكوين نفسي ديني فارغ من نازعة تأنيب الضمير اتجاه التحرش + تربية مشوهه مفيهاش بربع جنيه حب واحتواء للاولاد= فبتكون النتيجة بكل بساطة انك بتخلق حيوانات وحشية بدون اي مبالغة في التعبير..الكل فيه جاني زي ماهو ضحية.

ودي كلها اللي بتشكل كل مظاهر القرف اللي بنعيشه مش لبس البنت اللي بيتصدرلنا من اول ما وعينا.